Matthew 23

Loina 'ana tohe'itao ma Palisiyao Yesu 'iheliyediya

(Maki 12:38-40; Luke 11:37-52, 20:45-47)

1Ta Yesu boda ma 'ana tomuliyao 'oidiya 'igwaeya, 'igwae, 2“Mwalo hene meIsileli* Mosese 'iloiloinaedi, ta nige loina 'ana tohe'itao ma Palisiyao* gide siloiloina 'esegomi. 3Coinega to'aha gide sihe'itegomiya wamuliyedi, ma hesi 'idi paihowao sahena wahe'au'aunaowedi, weyahina taudi sihehe'itamo, ma geya 'idi he'itaedi sipaihowadi.

4“Taudi 'aha'ahala mwaudi tomota si'ebwa'ebwaedi, ma hesi taudi geya sitagwala ma 'aha'ahalaedi 'oidiyega si'abihetedi.

5“Cidi paihowao mabwaiyana sipaipaihowadi ma 'abehega tomota si'itadi ma sihepwatuwedi, beno gwaeyao Buki He'asisi 'oinega leleleledi manidiya ma nimadiya si'abihe pa'inediya, ta 'adi 'ale'owao duduledi sisohasohadi, 6ta guyai 'adi tuta nuwanuwadi ma wagahata simiyatoi, ma wete hada tapwalolo 'oidiya 'ebemiya 'ausaladi nuwanuwadi, 7ma 'eguma 'ebe maketi 'oina sitauya nuwanuwadi ma tomota baibaiwadi siloyauwedowedi nuwana si'ahwa tohe'itaedi. 8Ma 'omi hesi sahena tomota si'ahwa'ahwa tohe'itegomi, weyahina 'imi tohe'ita 'aigeda tuwamo, ma mabwaiyami wahemahemahetena.

9“Wete sahena 'aigeda taiya bale'uwa wa'ahwa'ahwa tamanae, weyahina tamamiu 'aigeda tuwamo galewa 'imiyamiya.

10“Sahena wete tomota si'ahwa'ahwa badaegomi, weyahina Keliso tauna 'iboinamo 'imi bada. 11Ma 'eguma taiya 'oimiyega nuwanuwana 'ihetohanugeta 'ida he'ali'e 'oimiya, 12ma 'eguma taiya 'oimiyega 'inuwahane nata 'isulu, ma 'eguma taiya 'inuwadobi nata 'ihane.

13“Ma hesi 'omi loina 'ana tohe'itao ma Palisiyao 'atemuyamuyaimi, weyahina 'imi 'abowega tomota wa'ausidiya ma 'oinega Yehoba 'ina 'ebeloina 'oina sahena siluhuluhu. Comi geya'abwa waluhuluhu, ma tomota wete taiyawedi nuwanuwadi ma siluhu wanuwahidiya.

15“Comi loina 'ana tohe'itao ma Palisiyao 'atemuyamuyaimi, weyahina 'aigeda wete bewa 'imi pui. Tuta baibaiwana wa'ada'adau sakowasi 'asa baibaiwadi 'oidiya ma 'abehega 'ami tomuliya 'aigeda waloba, ma muliyetega tomotaina wahe'ita ma gide 'omi wapaipaihowa Tomudulele* 'oina, tauna gide 'ipaihowa hedada.

16“Hesi 'atemuyamuyaimi, weyahina 'omi tohanugetao mata gibugibumi, wagwae, ‘Ceguma taiya Hada He'asisi saninega 'i'eta'wata'walulu beno geya 'aigeda to'aha, ma hesi 'eguma taiya goulaedi Hada He'asisi 'alona 'oidiyega 'i'eta'ota'olulu beno ginaula madouna, 'oinega 'ilobwaineya ma ginaulaina 'ipaihowa.’ 17Moisa, 'omi yauyauleimi ma mata gibugibumi! To'aha madouna? Hada He'asisi 'ana goula? bo Hada He'asisi tauna 'oinega goula 'ihe'asisiyeya?

18“Ma wete wagwae 'abehega 'eguma taiya 'ebe pwaoli saninega 'i'eta'olulu, beno geya 'aigeda to'aha, ma hesi 'eguma 'i'eta'walulu pwaoliina 'ebe pwaoli 'oina, beno ginaula madouna, 'oinega to'aha 'igwae hemiseya, sawasawahina ma 'ipaihowa.’

19“Comi yauyauleimi! To'aha madouna? Pwaoliina, bo 'ebe pwaoli tauna 'oinega pwaoliina 'i'abihe 'asisiyeya?

20“Coinega 'eguma taiya 'ebe pwaoli saninega 'i'eta'walulu, tauna wete ginaula mabwaiyana 'ebe pwaoli 'oina 'oidiyega 'i'eta'wata'walulu. 21Ma wete 'eguma taiya Hada He'asisi saninega 'i'eta'wata'walulu, tauna wete Hada He'asisi 'ana tomiya saninega 'i'eta'wata'walulu. 22Ma 'eguma taiya galewa saninega 'i'eta'walulu, tauna Yehoba ma wete 'ina 'ebemiya saninega 'i'eta'wata'walulu.

23“Comi loina 'ana tohe'itao ma Palisiyao 'atemuyamuyaimi hesi, weyahina to'abo 'omi. Moisa 'imi helauwedi 'ausala weyahina 'imi helauwedi 'imi ginaula mabwaiyadi 'oidiyega, tobwatobwa madoudi ma wete ginaula 'i'iudi, gide hali pam ma hali pam 'oidiyega, ma hesi loina 'etoi madoudi wanuwanaidediya, beno mumuga dumwaluna ma 'atemuyamuya ma hemisa. Sowasowana ma ginaula bewa madoudi wapaihowadi, ma wete sahena ginaula 'i'iudi wanuwanuwa naidedi. 24Ma 'omi tohanugetao mata gibugibuimi, 'ami 'wayahi 'oinega sohusohu wa'ewa yahuledi ma hesi hebai madouna, kameli* gide watonetonedi.

25“Comi loina 'ana tohe'itao ma Palisiyao 'atemuyamuyaimi hesi, weyahina 'imi 'abowega biyo ma gaeba 'atamanega wabuyodiya, ma 'alodiya bi'ibi'idi, beno yagaha ma mumuga galadi simaha. 26Comi Palisiyao mata gibugibuimi, 'imi biyo ta 'imi gaeba 'alodi wa'abi he'ehau nugetedi, ma 'oinega wete 'atamanega wa'abi he'ehaudi.

27“Comi loina 'ana tohe'itao ma Palisiyao 'atemuyamuyaimi weyahina 'omi to'abo, gide tuwa galiha wa'ewa'e'edi ma 'ausaladi, tabwana 'adi 'ita 'ausala hedade, ma hesi 'alodiya tomota hilihiliyadi ma ginaula bi'ibi'idi simiyamiya. 28Comi 'ami 'ita tomota matadiya 'abehega tohanugetao 'ausalami, ma 'alomiya 'abo ma gala baibaiwana simiyamiya.

29“Comi loina 'ana tohe'itao ma Palisiyao 'atemuyamuyaimi ta to'abowao, weyahina palopitao nugenugetadi 'adi galiha 'oidiya 'adi 'ebe nuwatuhuyahina wa'abidiya, ma wete tobwebwe'ana mwalo hene 'adi 'ebe nuwatuhuyahinao wa'atububudiya, 30ma wagwae, ‘Ceguma mwalo hene tamiyamiya tubudao 'idi tuta, sahena tubudaowedi talemelemedi palopitao 'adi lohe'amasa weyahina.’ 31Cimi gwae bewa 'oinega wahepwaila pwaiya 'abehega palopitao 'adi tolohe'amasao tubudiyao 'omi. 32Coinega taudi 'idi paihowaedi 'abwa walosalohidi.

33“Comi mwata natunao, ta geya sawasawahina ma 'asa 'ala'alatana* 'oinega wadena. 34Coinega palopitao ma tosanapuwao ma loina 'ana tohe'itao yahesumanediwa ma nata tupwadi walohe'amasidi, nuwana kelose 'oina watutu hepa'inedi, ma tupwadi 'imi hada tapwalolo 'oidiya balaeyega wahunudi, ma 'asa 'aigeda 'aigeda 'oidiyega wapa'idi.

35“Ma 'ana 'ebelosaloha 'oina tobwebwe'ana 'adi lohe'amasa 'ana maisa mabwaiyana 'omi waloba. Loheya nugenugetana Ebeli* tauna tobwebwe'ana silohe'amasiya, eeta silolohe'amasa 'ana siga Balakaya natuna Sakaliya wete silohe'amasiya Hada He'asisi ma 'ebe pwaoli gamwagamwanidiya. 36Moisa, lohe'amasaidi mabwaiyadi 'adi maisa nata 'omi mehau bewa waloba.

Yesu 'idouwa Yelusalema weyahina

(Luke 13:34-35)

37“Yelusalema yo! Togidega ta palopitao 'ulohe'amasidiya ma wete Yehoba 'ina tohalewasao galewega 'uloda'ulediya. Tuta baibaiwana nuwanuwagu ma 'ino tomotaiyao yabwau he'autedima gide 'am'am natunao pepenega 'i'ahusamudiya, ma tuwa silogwahategauwa. 38Coinega Yehoba nata 'i'ebesinego ma ma'ino pui tuwa 'umiyamiya. 39Ta yahegwaego 'abehega sahena wete 'u'ita'ita hilegau ma 'ana siga 'ino tomotaiyao sitagwala 'oiguwa ma sigwae, ‘Tahepwatuwe tauna Yehoba saninega 'inaoma.’”